Díli-SMI: Tuir dokumentu ofisial kona-ba lista naran membru organizasaun Persaudaraan Setia Hati Terate – PSHT ne’ebé tama ilegal ba Atamabua – Belu hodi hasa’e sintu maioria hosi munisípiu Covalima no Bobonaro.
Dokumentu ofisiál ne’ebé SMI asesu hatudu katak membru PSHT hosi munisípiu Covalima hamutuk ema na’in 87 ne’ebé kompostu hosi mane hamutuk ema na’in 83 no feto hamutuk ema na’in 4
Nune’e mós hosi parte munisípiu Bobonaro (Maliana) membru PSHT ne’ebé tama ilegal ba Atambua hamutuk ema na’in 55 ne’ebé kompostu hosi mane hamutuk ema na’in 54 no feto hamutuk ema na’in 1.
Totál membru PSHT hosi munisípiu Baucau hamutuk ema na’in 47, Ermera hamutuk ema na’in 41, Liquiça hamutuk ema na’in 39, Díli hamutuk ema na’in 54, Ainaro hamutuk ema na’in 15, Manatuto hamutuk ema na’in 9 no Viqueque hamutuk ema na’in 11 ne’ebé rejistradu hakat fronteira ho ilegalmente.
Hosi totál membru PSHT rejistradu tama hakat ilegal fronteira hamutuk ema na’in 361 ne’e kompostu mane hamutuk ema na’in 341 no feto hamutuk ema na’in 20.
Membru PSHT feto hamutuk ema na’in 20 ne’e mai hosi munisípiu Baucau hamutuk ema na’in 6, Covalima hamutuk ema na’in 4, Bobonaro hamutuk ema na’in 1, Likisa hamutuk ema na’in 3, Díli hamutuk ema na’in 4, Ainaro hamutuk ema na’in 1 no Viqueque hamutuk ema na’in 1.
Konsuladu Timor-Leste ba Kupang – Indonézia, Jesuino dos Reis Matos, esplika, tuir dadus ne’ebé parte konsuladu simu katak maizumenus membru PSHT hamutuk ema na’in 361 mak rejistradu hakat fronteira ho ilegalmente tama Atambua ho intensaun atu hasa’e sintu.
“Tuir lista iha membru PSHT hamutuk 361 ne’ebé tama mai Atambua ho ilegal atu hasa’e sintu. Orseik polisia iha Atambua kaptura membru PSHT hamutuk 133, no restu hosi totál ema na’in 361 ne’e sei espalla iha Atambua, tuir informasaun ema hirak ne’e sei kontinua hela iha Atambua, área malaka nian”, dehan, Konsuladu Timor-Leste ba Kupang – Indonézia, Jesuino dos Reis, ba SMI liu-hosi via telefone, Tersa, (10/08).
Liga ho kondisaun timoroan membru artemarsial PSHT iha Atambua, Jesuino, eplika, parte konsuladu halo ona aprosimasaun ba parte kompetente sira atu bele buka solusaun ba membru PSHT ne’ebé tuir lista sei subar iha área Atambua nian inklui lori fila sira ne’ebé kapturadu.
“Iha ne’e, depois ha’u simu informasaun, ha’u esforsu buka solusaun hodi lori fila membru PSHT ne’ebé tama mai ho ilegal. Ha’u kordena ona ho DANREM Kupang hodi haree mekanizmu sira hodi lori fila sira tama mai ilegal ne’e, tanba iha ne’e aplika mós serka sanitáriu hanesan iha ita nia rai”, Reprezentante TL iha Kupang ne’e.
Iha parte seluk, líder organizasaun artemarsial PSHT, Baltazar Lemos, hatete ba mídia lokal iha rai-laran katak nia rasik laiha kuiñesementu kona-ba ninia membru ne’ebé tama ilegal iha Atambua hodi hasa’e sintu.
Baltazar, afirma, membru hirak ne’ebé tama ilegal ba Atambua hodi hasa’e sintu ne’e laiha karta autorizasaun hosi parte organizasaun tanba durante ne’e Governu seidauk fó autorizasaun hodi hala’o atividade artemarsial nian.
“Sira ba sa’e sintu iha Indonézia, sira ba ne’e pesoal, no ilegmente, sein kuñesementu hosi ami, ne’in governu, sira ba ne’e ilegal”, katak, Baltazar.
Membru PSHT hamutuk ema na’in 113 ne’ebé hetan kapturasaun hosi autoridade seguransa Indonézia foin lalais ne’e iha pontu entrada rua, iha área Fatubenao A, aldeia Fatubenao, Postu Administrativu Atambua Villa, Munisípiu Belu. (Editór, Caleri).
