Díli-SMI: Associação dos Antigos Deputados de Timor-Leste – AADTL sente preokupa ho hahalok deputadu no deputada sira iha uma fukun Parlamentu Nasional fulan hirak liu-ba baku rahun mejá plenária ne’ebé nakon ho valor istóriku hosi primeiru Asembleia Konstituente nian.
Prezidente AADTL, José Nominando Martins “Buras” esplika, meja plenária iha PN ne’ebé deputadu sira baku-rahun ne’e iha valor istóriku tanba iha tinan 2002 membru Asembleia Konstituente hamutuk ema na’in 88 halo asinatura ba Konstituisaun RDTL nian.
“Ami preokupa ho meja Parlamentu Nasionál ne’ebé deputadu baku rahun tanba iha ninia valor istóriku ne’ebé boot tebes. Iha meja ne’e nia leten mak ami deputadu na’in-88 halo asinatura ba Konstituisaun RDTL”, dehan, Nominando Buras, hafoin ho membru AADTL halo enkontru ho PR iha Palásiu Prezidensiál, Bairu-Pite, Díli, foin lalais ne’e.
Durante audénsia ho Prezidente Repúblika, Francisco Guterres Lú Olo, AADTL rona hanoin no idea kona-ba oinsa bele fó rekuiñesementu ba membru Asembleia Konstituente ema na’in 88 ne’ebé hakerek ona konstituisaun RDTL ne’e.
Maske nune’e, nia haktuir, Prezidente Repúblika rasik sei tetu rekomendasaun hosi AADTL kona-ba fó rekuiñesementu ba membru Asembleia Konstituente sira ne’e.
Nominando Buras, fó razaun AADTL hasoru PR tanba uluk nia nu’udar Prezidente Asembelia Konstituente iha tempu refere.
Prezidente Repúblika hateten katak sei tetu atu fó rekoñesimentu ba membru deputadu na’in-88 ne’ebé hakerek Konstituisaun. Atu fó rekoñesimentu, Prezidente Repúblika sei haree baze jurídiku kona-ba sira-nia kontribuisaun.
“Organizasaun ne’e mai hasoru Prezidente Repúblika Francisco Guterres Lú Olo, tanba uluk assume kargu nu’udar Prezidente Assembleia Konstituinte no ikus-mai sai Prezidente Parlamentu Nasionál iha primeira lejislatura”, katak nia.
Antes remata entrevista ho jornalista sira, Prezidente AADT ne’e haktuir, Xefe Estadu rasik mós husu ba antigu deputadu sira atu hamutuk ho PN hodi kria komisaun ida hodi prezerva valór istóriku iha prosesu hakerek Lei Inan Timor-Leste nian. (Editór, Francisca Soares).
