Díli-SMI, Relasiona ho empase polítika iha rai-laran ne’ebé to’o ohin loron seidauk iha solusaun fó impaktu ba merenda eskolar ba labarik sira tanba laiha orsamentu hodi fasilita ai-han ba estudante sira.
Diretúr Asosiasaun HAK, Manuel Monteiro, esplika, tuir rezultadu monitorizasaun identifika maizumenus Eskola Baziku Filíal - EBF 5 mak iha problema merenda eskolar durante tinan 2018 tanba problema orsamentu.
“Eskola lima (5) ne’ebé mak hetan problema kona-ba merenda eskolar ne’e mak eskola hanesan EBF Tuana Laran, EBF Kamea Bekora, EBF Fatuhada, EBF Fomentu, no EBF Maloa”, dehan Manuel.
Direitor ne’e esklarese, normalmente merenda eskolar ne’e la’o tinan ida maibe realidade estudante sira nia diretu merenda eskolar fulan hat (4) relasiona ho situasaun polítika ne’ebé la’o iha rai-laran.
“Loloos merenda eskolar ne’e la’o to’o tinan ida tomak maibé realiade estudantes sira hetan deit merenda eskolar durante fulan 4 deit, la too tinan ida. Kestaun ne’e tamba inserteza polítika ne’ebé mak agora dadauk infrenta hela”, tenik nia.
Iha parte seluk, Diretór Diresaun Nasional Asaun Sosiál Eskolar, Belchior Maria Almeida Barros, rekuiñese problema merenda eskolar ne’ebé akontese durante ne’e tanba orsamentu tarde.
“Durante nia ezekusaun ba merenda eskolar dezde tinan hirak liu ba ita hatene katak problema ne’ebé mak sempre akontese ita tarde orsamentu. Tinan-tinan ita nia kalenderiu eskolar ne’e hahu iha Janeiru maibé dala barak merenda eskolar ne’e komesa iha marsu to’o abril 2017”, dehan Belchior Almeida.
Nia haktuir, durante tinan 2017 Governu aloka orsamentu hamutuk $.9 Milloens hodi kobre eskola sira iha Munisipiu 12 no la inklui ho RAEOA ne’ebé konsege ezekuta deit $.5 Milloens. No, tama iha tinan 2018 Governu laiha orsamentu hodi aloka ba asuntu merenda eskolar nian.
Rezultadu monitorizasaun HAK kona-ba merenda eskolar ne’e bázea ba munisipiu rua (2) hanesan Munisipíu Díli no Aileu. (Editor, Lariwa).
