Ermera-SMI: Líder komunitáriu ho komunidade hosi Postu Administrativu Hatolia,Munisípiu Ermera, sente preokupa ho postu saúde suku Hura-Hou ne’ebé besik fulan 3 ona abandonadu tanba la-uza ona ba atividade atendementu ba públiku.
Komunidade suku Ura-Hou, Reis da Costa Gove, esplika postu saúde kuaze fulan 2 resin atu ba fulan 3 ona la halo atividade atendementu saúde ba komunidade sira iha area refere.
"Durante ne'e Doutor ida ho parteira ida maka hala’o serbisu iha sentru refere , depois de ida ne’e parteira ida mai fali, hotu Dotura ida mai tan to’o agora sira la-mai hotu, kuaze fulan rua resin ona”, dehan, Reis Dacosta Gowe, ba SMI, iha Suku Ura-Hou, Tersa, (27/10 foin lalais ne’e.
Reis ne’ebé nu’udar mos cleaner ida iha postu saúde Ura-Hou, klarifika, laiha informasaun ne’ebé klaru tansá mak pesoál saúde sira ne’e abandona sentru refere.
“Doutora sira la fó infomasaun loloos tanba saida maka sira abandona sentru refere no sira ba Serbisu fali iha fatin seluk mós ami la hatene tuir to’o agora. Suku Ura-Hou simu tratamentu kada fulan dala ida maka programa saúde hanaran "Siska" liu ida ne’e komunidade balun moras sira mak hola rasik aimoruk hodi konsumu”, tenik, Reis Gove.
Preokupasaun no insastifasaun hanesan mai hosi, Lucas Lemos Pereira, katak, komunidade barak mak moras ba sosa aimoruk mesak hodi konsumu tanba postu saúde taka.
Nune’e nia husu ba parte Ministériu Saúde – MS atu koloka pesoál saúde atu hela permanente iha postu refere atu bele atende komunidade ne’ebé moras.
“Iha Tempu udan komunidade moras barak no hola rasik aimoruk hodi komsumu mais realidade sira besik sentru saúde. Hakarak pesoál saúde tenke ba hela iha Iha sentru refere”, dehan nia.
Iha parte seluk, Xefe Suku Ura-Hou, Alberto Soares, mós hato’o ninia lamentasaun ba asuntu abandonadu sentru saúde iha suku Ura-Hou nian.
Líder komunitáriu ne’e haktuir, antes ne’e pesoál saúde hala’o serbisu iha sentru refere maibe depois instalasaun sentru saúde foun iha suku seluk fó impaktu ba sentru saúde suku Ura-Hou sai abandonadu.
“Durante ne'e sira hala’o Servisu iha sentru refere mais depois de sentru saúde iha Suku Giza-Rudu di’ak sira komesa ba fali iha ne’eba no Abandona Sentru saude iha Suku Ura-Hou”, katak nia.
Relasiona ho preokupasaun komunidade no líder lokál nian, Diretúr Serbisu Saúde Munisípiu Ermera, António de Deus Fátima, klarifika, pesoál saúde la abandona sentru maibe hala’o serbisu iha fatin seluk tanba nesesidade hotu atu atende komunidade.
António, afirma, kestaun rekursu umanu sai fatór krusiál ida ne’ebé labele atende hot-hotu sentru saúde sira iha postu Hatolia, munisípiu Ermera tuir komunidade ninia espetasaun.
“Problema sira ne’e mosu tanba kauza hosi menus rekursu umanu, maibe hanesan Diretúr Serbisu Saúde Munisípiu Ermera nian, nafatin esforsu hodi tau pesoál saúde iha sentru hotu-hotu la’os Suku Ura-Hou de’it”, tenik nia. (Editór, Caleri Alves)
